Во рамките на одбележувањето на патрониот празник, УГД денес промовираше 12 доктори на науки од различни области.
Ректорот на УГД – Штип, проф. д-р Дејан Мираковски, истакна дека осум доктори на науки се од медицинските науки, а четворица од останатите факултети на Универзитетот.Денес е денот на нивната промоција во чест на нашиот патронен празник. Како Универзитет еднаш годишно ја вршиме оваа промоција и официјално ги промовираме нивните докторски дипломи. Чест ми е што имаме поголем број на доктори на науки, а посебна чест ми претставува што квалитетот на нивните трудови е препознатлив и прифатлив во реалната пракса и од пошироката наука – вели Мираковски.
Маја Чочевска докторираше на Факултетот за медицински науки, отсек Фармација, а како што вели нејзината теза е од полето на радиофармацијата.
Јас работев делумно на Универзитетот овде, делумно во Универзитетскиот институт за позитронска мисиона томографија, бидејќи е единствен институт којшто го работи ова поле во радиофармацијата и мојата теза беше воведување на нова методологија во развој која се користи за тумори – вели Чочевска.
Теодора Топчева е новиот доктор на науки на Машинскиот факултет, а темата на нејзиниот труд е мерење и изложеност на работниците на бучава по погон за производство за автомобилска индустрија. Посочува дека трудот го има изработено со помош на лабораторијата АМБИКОН при УГД-Штип, а според истражувањето компаниите треба да водат сметка за бучавата во којашто работат. Според неа, реалниот сектор, а особено големите компании внимаваат и ги почитуваат законските норми.
Новите доктори на науки од Факултет за медицински науки се:
- Маја Чочевска – доктор на фармацевтски науки;
- Катерина Колевска – доктор на фармацевтски науки;
- Никола Симоновски – доктор на фармацевтски науки од областа аналитика на лекови;
- Ромир Кадриу – доктор на медицински науки;
- Амела Цана – доктор по стоматолошки науки;
- Верица Јаќимовска – доктор на фармацевтски науки;
- Ариан Даци – доктор по стоматолошки науки;
- Емилија Рамбабова – доктор по стоматолошки науки.
Од Економскиот факултет:
- Тодор Бадаровски – доктор по економски науки во областа на деловна економија.
Од Технолошко-технички факултет:
- Филип Кочоски – доктор по технички науки од областа на науката и технологијата за композитни материјали.
Од Факултетот за туризам и бизнис логистика:
- Агим Асани – доктор на науки по туризам и угостителство.
Од Машинскиот факултет:
- Теодора Топчева – доктор на науки во областа машинство.
Од Факултетот за образовни науки:
- Сања Гацов – доктор на образовни науки – училишна педагогија.
