Студентите на додипломски и магистерски студии на Универзитетот „Гоце Делчев“ – Штип имаат можност да ги искажат своите ставови, креативност и аналитички вештини на Конкурсот за пишување есеј на тема „Иднината на корупцијата 2036: интегритет, добро владеење и отчетност“, организиран од Мисијата на ОБСЕ во Скопје.
Авторите на трите најдобри есеи ќе бидат наградени со ИТ опрема. Крајниот рок за испраќање на трудовите е 25 ноември 2026 година.
Предизвик за младите: Како ќе изгледа борбата против корупцијата за десет години?
Надоврзувајќи се на неодамнешната серија антикорупциски мастер-класови на кои активно учествуваа и студентите од УГД, ОБСЕ ги поттикнува младите да размислуваат визионерски и критички. Централното прашање на кое треба да одговорат авторите е: „Како би можела да се развива корупцијата во иднина и што можат да направат општествата уште денес за да изградат посилна култура на интегритет и отчетност?“
Наместо класичен академски труд, студентите имаат слобода да изберат креативен пристап и да пишуваат во форма на:
- Идни сценарија за корупцијата и транспарентноста во 2036 година;
- Наративни есеи или писмо од иднината во кое се анализираат последиците од денешните одлуки;
- Препораки за јавни политики од перспектива на иднината;
- Измислени новинарски статии или дневни записи од 2036 година.
Технички правила и критериуми за оценување
За да бидат прифатени за евалуација од страна на четиричлената професорска комисија, есеите мора да ги исполнуваат следниве услови:
- Јазик и формат: Есејот треба да биде напишан на англиски јазик, со фонт Times New Roman (големина 12, проред 1,15) и доставен во PDF формат.
- Должина: Строго помеѓу 1.400 и 1.600 зборови (околу три страници). Трудовите што ја надминуваат оваа должина нема да бидат разгледувани.
- Употреба на вештачка интелигенција (ВИ): Дозволено е користење на ВИ алатки само како поддршка при истражување или јазично уредување, но не и за генерирање на текстот или аргументите. Секоја употреба на ВИ мора транспарентно да се наведе во кратка изјава на крајот од есејот.
- Анонимност: Името и презимето на авторот не смеат да стојат во документот, туку се наведуваат исклучиво во телото на е-пораката.
Комисијата ќе ги оценува трудовите со максимум 100 поени, поделени еднакво (по 25 поени) во четири категории: оригиналност и креативност, разбирање на проблематиката, критичко размислување насочено кон иднината и квалитет на предложените препораки.
Онлајн инфо-сесија и начин на аплицирање
Една недела пред истекот на рокот, Мисијата на ОБСЕ ќе организира онлајн инфо-сесија на Zoom за сите заинтересирани студенти, каде што ќе бидат дадени подетални насоки за подготовка на конкурентен есеј. За добивање линк и информации за точниот термин на сесијата, како и за испраќање на готовите есеи, студентите треба да се обратат на е-пошта: arben.ajrulai@osce.org.
Повеќе информации на следниов линк: https://skopje.osce.org/mk/news/mission-skopje/669582
