Свесноста за (не)безбедноста во сајбер просторот беше тема на настанот кој заеднички го организираа Правниот факултет на УГД, Италијанската национална полиција, Амбасадата на Република Италија во Македонија и Универзитетот во Салерно.
– Денес на Правниот факултет заедно со Италијанската национална полиција, Амбасадата на Италија во Македонија и со Универзитетот во Салерно, како и учениците од Средното општинско училиште „Славчо Стојменски“. Имаме проекција на три краткометражни филмови, кои треба да ја подигнат свеста за опасностите во дигиталниот свет. Младите се постојано на интернет и ги добиваат сите вести и информации, но освен предности треба да знаат дека овој свет има една мрачна заднина. Благодарност за претставниците од Италија кои препознаа партнери во нас – изјави деканката на Правен факултет, проф. д-р Олга Кошевалиска.
За амбасадорот на Република Италија во Македонија, н.е. Паоло Палминтери, е од големо значење што Амбасадата има добра соработка со Универзитетот „Гоце Делчев“, којашто се проширува и на една вака значајна тема.
– Навистина сум благодарен за ова што го прави денес италијанската полиција. Ова е навистина важна тема којашто има особено широк јавен интерес во Италија, но и прашање кое се третира и во македонската јавност – рече амбасадорот Палминтери.
Она што го работи италијанската полиција преку својот посебен оддел за оваа намена го истакна претставничката на Поштенската државна полиција на Италија, Роберта Манцо.
– Идејата на италијанската полиција е да се превенира криминалитетот. Ние се засноваме на превенција во однос на постигнување на резултатите. Особено за да се постигне еден таков ефект каков што е предвиден, државната италијанска полиција прави проекти и меѓу такви проекти се овие кои се насочени за младите и најмладите за коректна употреба на сајбер алатките и социјалните мрежи. Токму од идејата да се справат со ваквите појави и да се укаже на фактот на коректна употреба на технологијата. Оттука се раѓа идејата да се направи краткометражен филм кој укажува на злоупотребата на социјалните мрежи. Поштенската полиција во Италија е токму надлежна да се бори со овој вид на криминалитет.
Во целиот проект е вклучен и Универзитетот во Салерно, кој заедно со УГД е вклучен во проектот „Жан Моне“, во кој е вклучена и проф. д-р Тереза Русо.
-Идејата е да ги зближиме младите и да ја потикнеме свеста за тоа што претставува сајбер насилството во дигиталните платформи за да ги подготвивме како идни граѓани на Европската Унија – рече проф. д-р Русо.
На настанот беа прикажани три кратки филмови:
- „101% Who controls your choices?“ – авторско дело на Роберта Манцо, Винченцо Капоне и Иленија Лука од Италијанската државна полиција;
- краток филм изработен од ученици од СОУ „Славчо Стојменски“ – Штип, под менторство на проф. Емилија Наунова;
- краток филм изработен од студенти од Факултетот за образовни науки при УГД, под менторство на проф. Даниела Коцева.
