Универзитетот „Гоце Делчев“ – Штип успешно реализираше дводневна обука за млади истражувачи, посветена на подготовката на конкурентни проектни апликации за европски програми за финансирање.
Обуката, која се одржа на 9 и 10 јули 2026 година, претставува уште една потврда за стратешката определба на Универзитетот континуирано да инвестира во развојот на научноистражувачкиот потенцијал и интернационализацијата.Во услови кога европските програми сè повеќе ги препознаваат иновативните идеи, интердисциплинарните истражувања и меѓународната соработка како двигатели на развојот, Универзитетот „Гоце Делчев“ создава можности младите научници да стекнат практични знаења и компетенции неопходни за успешно учество во европски проектни конзорциуми.
Во текот на обуката, учесниците имаа можност да се запознаат со целиот процес на развој на една проектна идеја – од иницијалниот концепт до подготовка на квалитетна проектна апликација. Посебен акцент беше ставен на идентификацијата на релевантни европски програми за финансирање, дефинирањето на проектните цели, очекуваните резултати и индикаторите за успех, како и на подготовката на работни пакети, распределбата на активности и практичната разработка на минипроектни предлози.
Обуката беше реализирана преку интерактивен пристап, комбинирајќи предавања, практични вежби, работа во тимови и презентација на проектни идеи. Ваквиот начин на работа им овозможи на учесниците да стекнат реално искуство во развојот на проектни концепти, но и да ги унапредат своите способности за тимска работа, критичко размислување и стратешко планирање.
Со организирањето на оваа обука, Универзитетот „Гоце Делчев“ уште еднаш ја потврдува својата улога како современа високообразовна и научноистражувачка институција која активно инвестира во човечкиот капитал и создава генерации истражувачи подготвени да бидат дел од европскиот истражувачки простор.
Поддршката на младите истражувачи претставува една од клучните стратешки определби на Универзитетот. Преку вакви активности се поттикнува развојот на нови истражувачки идеи, се зајакнуваат капацитетите за подготовка на конкурентни европски проекти и се отвораат нови можности за меѓународна соработка, мобилност и научна извонредност.
Универзитетот „Гоце Делчев“ – Штип ќе продолжи да организира вакви обуки и програми за професионален развој, со цел да создаде силна заедница на истражувачи кои ќе придонесуваат кон научниот развој, иновациите и општествениот напредок во Република Северна Македонија и пошироко.
