Со свечено отворање во просториите на Економскиот факултет при УГД започна тридневната Меѓународна стартап академија, која од 23 до 25 април обединува средношколци и студенти од Македонија и од Бугарија во заедничка работа на развој на иновативни бизнис идеи.
Академијата се реализира во координација помеѓу Универзитет „Гоце Делчев“ – Штип и Американско катче – Штип, со поддршка на Амбасада на САД во Северна Македонија, и претставува платформа за поттикнување на претприемништвото, иновациите и регионалната соработка меѓу младите.
Проректорот за развој на УГД, проф. д-р Дарко Лазаров, истакна дека академијата има за цел да им овозможи на младите не само да стекнат нови знаења, туку и да ги трансформираат своите идеи во реални бизниси.
„Оваа меѓународна стартап академија треба да им овозможи на студентите да слушнат нови концепти за претприемништво и иновации, но и преку интерактивна работа да ги развијат своите бизнис идеи во реални стартапи. Нашата цел е да изградиме екосистем во кој студентите нема само да стекнуваат академски знаења, туку ќе бидат подготвени да станат идни претприемачи и креатори на нови работни места“, изјави Лазаров.
Тој додаде дека Универзитетот веќе работи на развој на стартап центар, како дел од поширока стратегија за поддршка на иновациите и поврзување со потенцијални инвеститори.
Координаторот на Американско катче – Штип, Благој Трајков, посочи дека на академијата учествуваат околу 50 млади кои во текот на трите дена ќе работат на развој и презентација на свои идеи.
„Главната цел е младите да стекнат претприемачки вештини, но и да се поврзат меѓусебно, да разменат идеи и да создадат основа за понатамошна соработка. Ова е второ издание на академијата, но прво со меѓународен карактер“, истакна Трајков.
Учесниците ја оценуваат академијата како значајна можност за стекнување нови искуства и контакти. Средношколецот од Бугарија, Владислав Колев, вели дека е задоволен од приемот и очекува да стекне нови знаења и познанства.
„Се чувствуваме одлично прифатени. Тука сум за да научам нови работи и да запознаам луѓе. Очекувам да работиме заедно и да дојдеме до добра идеја“, изјави Колев.
Сличен став има и средношколката од Кочани, Ања Ситновска, која потенцира дека академијата нуди практични знаења за развој на бизнис идеи.
„Овде можеме да стекнеме знаења за тоа како да основаме сопствен бизнис и како да ја развиеме идејата. Дополнително, создадовме нови пријателства и разменуваме искуства, што е особено важно бидејќи академијата е интернационална“, истакна Ситновска.
Во рамки на академијата, учесниците ќе работат со ментори, ќе ги развиваат своите идеи и ќе ги презентираат пред стручно жири, со цел нивна понатамошна реализација и потенцијално претворање во одржливи стартап бизниси.
