Во периодот од 27 до 29 април 2026 година, на Латвиската академија за култура успешно се реализираше првата Работилница на ACE²-EU Alliance Knowledge Creation Team посветена на родовата еднаквост.
На настанот учествуваа студенти, академски кадар и надворешни партнери од девет партнерски универзитети, меѓу кои и претставници од Универзитетот „Гоце Делчев“ – Штип, проф. д-р Елена Максимова, проф. д-р Милица Шутова и докторанд Розе Сурловска-Ристевска. Преку работа во интернационални тимови, учесниците дискутираа за актуелните предизвици и можностите за идна соработка во унапредувањето на родовата еднаквост.
Работилницата овозможи отворен дијалог за прашања поврзани со родовиот идентитет, самоизразувањето, односите на моќ, нееднаквоста во платите и предизвиците на пазарот на труд, со посебен акцент на создавање инклузивна и безбедна средина за сите учесници.
Соработката продолжува и по завршувањето на работилницата, преку редовни онлајн состаноци и заедничка работа на интернационалните тимови, со можност за вклучување на нови учесници и експерти заинтересирани за темите поврзани со родовата еднаквост.
Програмата беше реализирана во рамки на SPACE Centre Social Impactors strand и претставува нов модел на соработка кој ќе биде основа и за идни работилници посветени на теми како култура и различности, социјална благосостојба, почит и достоинство.
