Во периодот од 26 до 30 мај 2025 година, во Охрид се одржа тренинг школа во рамките на COST проектот CA20121
„Bench to bedside transition for pharmacological regulation of NRF2 in noncommunicable diseases (BenBedPhar)“, под наслов „The NFR2 network: Molecules, pathways and therapeutic strategies in chronic disease”.Коорганизатори на оваа престижна тренинг школа беа проф. д-р Викторија Максимова и проф. д-р Татјана Рушковска од Факултетот за медицински науки при Универзитет „Гоце Делчев“ – Штип, како и проф. д-р Биљана Миова од Природно-математичкиот факултет при УКИМ во Скопје, која беше официјален организатор на школата и претседател на локалниот организациски одбор. Во организацијата активно учествуваа и ас. м-р Елена Рафаиловска и студентката Весна Трпчевска од УКИМ, како и студентот на Фармација, Круме Богевски од ФМН – УГД.
Во настанот учествуваа 21 млад истражувач и 7 професори од повеќе европски земји, меѓу кои Шпанија, Романија, Велика Британија, Австрија, Босна и Херцеговина, Финска, Ирска, Полска, Португалија, Србија, Турција, Хрватска, како и од Северна Македонија. Присутните експерти од различни научни дисциплини заеднички работеа во насока на истражување и развој на нови терапии за хронични болести преку фармаколошка регулација на NRF2 сигналниот пат.
Проф. д-р Татјана Рушковска, покрај организациската улога, се претстави и како предавач, презентирајќи ги своите најнови истражувања на тема „Use of integrative bioinformatic analyses to decipher molecular mechanisms of action of plant–derived bioactive compounds“. Проф. д-р Викторија Максимова одржа усна презентација на тема „Regulation of NRF2 pathway by epigallocatechin gallate and its potential as chemopreventive/chemotherapeutic agent”.
На тренинг школата со постер-презентација учествуваа и младите истражувачи Милкица Јанева, Сања Лазарова, Павлинка Кокошкарова и Мишко Милев.
Тренинг школата понуди сеопфатна програма што опфати предавања од врвни научници, биоинформатичка работилница и интерактивни сесии за презентација на индивидуални истражувања. Фокусот беше ставен на молекуларните механизми и терапевтски потенцијал на NRF2 сигналниот пат во контекст на оксидативен стрес, метаболички нарушувања и хронични заболувања. Настанот овозможи плодна научна размена, креирање нови соработки и вмрежување меѓу младите истражувачи и докажаните научници.
