Богољуб Мијалков, студент на втор циклус студии на Правен факултет при УГД, учествуваше на петдневната Blended Intensive Programme (BIP) „Designing Social Good: Bridging Sustainability and Project Management“, која се одржа на Универзитетот во Сантарем, Португалија.
Програмата обедини студенти од повеќе европски универзитети и се фокусираше на одржлив развој, проектен менаџмент и нивната улога во општествените промени. Учесниците работеа во мултикултурни тимови преку предавања и интерактивни сесии со современи пристапи во овие области.
„Ова искуство ми овозможи да соработувам со студенти од различни земји, да разменувам идеи и да се запознаам со различни култури и перспективи. Во текот на програмата стекнав значајни знаења за одржливоста, проектниот менаџмент и нивната улога во создавањето позитивно општествено влијание“, истакнува Мијалков.
„Беше одлична можност да посетам нови места и да се дружам со студенти и професори од различни универзитети“, додава тој.
Ова е уште еден пример како УГД, преку Алијансата ACE²-EU, им овозможува на студентите да студираат на матичниот универзитет, а истовремено да стекнуваат знаења и искуства на универзитети ширум Европа.
„Ги охрабрувам студентите активно да ги користат можностите за мобилност и да го надградуваат своето знаење преку меѓународни искуства со колеги од различни земји, отворајќи нови перспективи“, заклучува Мијалков.
