Во периодот ноември–декември 2025 година, Универзитетот „Гоце Делчев“ – Штип реализираше обемна теренска иницијатива во средните училишта низ Република Северна Македонија, со јасна порака: инвестицијата во знаењето е инвестиција во иднината на младите.
Беа посетени 30-тина средни училишта од различни региони, а учениците имаа можност директно да се запознаат со студиските програми, студентскиот живот и можностите што ги нуди еден современ, европски ориентиран универзитет. Преку интерактивни работилници, отворени дискусии и презентации, младите добија реална и автентична слика за академскиот свет, но и поддршка во процесот на избор на својата идна професионална патека.
Универзитет блиску до младите
Посебна вредност на оваа иницијатива претставува интерактивниот и ученик-ориентиран пристап, кој значително го зголеми интересот и активното учество на средношколците. Наставничкиот кадар, заедно со студентите-волонтери, споделија лични искуства од студентскиот живот, практичната настава, мобилностите преку Еразмус+ и можностите што ги отвора членството во Европската универзитетска алијанса ACE²EU.
Овој модел на комуникација се покажа како исклучително ефективен – младите не беа само слушатели, туку активни учесници во процесот на учење, прашување и планирање на својата иднина.
Партнерство со средните училишта и локалните заедници
Теренските активности придонесоа за зајакнување на соработката помеѓу Универзитетот и средните училишта, како и за градење доверба и долгорочни партнерски односи. Преку директна комуникација со наставниците, стручните служби и директорите, УГД ја потврди својата улога како отворена, општествено одговорна и иновативна високообразовна институција.
Споделените искуства и комункацијата на кадарот на УГД со средношколците доведоа до видливи резултати – зголемена информираност кај учениците, позитивна перцепција за квалитетот на наставата, конкретен интерес за одредени студиски програми и воспоставени контакти со потенцијални идни студенти.
Стратегија што продолжува
Оценката на целокупната иницијатива е исклучително позитивна – како од аспект на професионалната реализација, така и од аспект на постигнатото влијание. Универзитетот „Гоце Делчев“ – Штип уште еднаш покажа дека теренските активности не се само промоција, туку дел од неговата поширока образовна и општествена мисија.
Врз основа на постигнатите резултати, ваквиот модел на работа ќе продолжи и во наредните години, со можност за проширување и дополнително продлабочување, со цел уште поголем број млади луѓе навремено да добијат поддршка, мотивација и јасна визија за својата академска и професионална иднина.
