Универзитетот „Гоце Делчев“ – Штип, како дел од европската алијанса ACE²-EU, ги поканува студентите да учествуваат на следната сесија на ACE Virtual Coffee, посветена на темата „Вработливост и развој на кариерата во Европа“.
Настанот ќе се одржи на 5 ноември 2025 година во 12 часот и ќе биде во хибриден формат, со физичко присуство на Универзитетот „Франциско де Виторија“ (UFV) во Шпанија и онлајн приклучување за студентите од сите партнер-универзитети.
Во рамки на оваа виртуелна средба, тимовите од канцелариите за кариера на сите ACE²-EU универзитети ќе споделат практични совети и искуства за тоа како студентите полесно да се снајдат на пазарот на трудот во различни европски земји.
Што може да се очекува:
- Кратки презентации од секој универзитет со совети, добри практики и културолошки особености при барање работа;
- Интерактивна Q&A сесија, каде што студентите ќе можат да поставуваат прашања преку QR код;
- 30-минутна панел-дискусија за размена на перспективи и одговори на прашања од студентите.
Околу 50 студенти од UFV (Шпанија) ќе присуствуваат на местото на настанот, а сите останати студенти од ACE²-EU партнерите, меѓу кои и од УГД, можат да се приклучат онлајн.
Настанот е одлична можност за сите кои сакаат да ја изградат својата кариера во европски контекст и да стекнат увид во различните практики за вработување низ континентот.
